Da can che l é stà betù in pè, l Istituto l é stà pensà anche cume centro de formazion, e cume che dis al Statuto a l articolo 2, letra i) e cheles che ien dapò, formazion par maestre e professore, e de la popolazion de cheste luoghe, che la parle par ladin o no. L Istituto al mantien raporte col mondo de la universitas, soralduto par chel che l à a ce fai co la formazion de ci che laora ize la scoles.
L Istituto, deboto dute i anes, al bete a dì corse, che i po esse fate ize la sede de Borcia o ize sales pi grandes ize l palazo de l Unione Montana de la Val de la Guoite, o ize spazie de outre ente locai o assoziaziones del teritorio. Ai corse po partezipà dute, ma ize la gran parte dei case i corse i é destinade a categories prezises. Al pì de la otes i corse de formazion i ien fate solo par chi che laora ize la Publica Aministrazion, e chesto suziede can che la leziones les ien finanziades proprio cun chesto limite dai proiete del la Leie 482/1999.
L istituto al parecia i programe dei corse, al ciata e l dà i incariche ai docente e ai tutors, al ciata i luoghe agnó fai la leziones, al fas publicità a dute i apuntamente e l va dos a dute i compite de segreteria.
Par i proiete finanziade de an in an coi fonde del Stato de la Leie n. 482/1999 no se po pi fai corse par maestre e professore, parché i fonde par chesta categoria i ien dade dereto al MIUR. Par chesta resones, chesta atività del Istituto Ladin l é duda a se perde.
I anes passade, l Istituto l é du a ora, anche cume editore, a publicà i ate dei corse de formazion, can che i era fenide ( cume, par esempio, la serie “Ladini Oggi”).
L istituto al laora pulito soralduto par l organidazion dei corse de formazion par ci che laora ize l turismo. Par i anes in dos, l Istituto al formaa pi che see i operatori dei Ufizie de informazion e organidazion turistica, dipendente, de fato, de l Aministrazion de la Provinzia de Belun, e che se ciataa ize duto l teritorio provinzial. Ades, però, ize i ufizie turistiche I é personal privato, tolesto su in diversa formes dai Ente locai o da private.
L Istituto ades al laora par bete in pè corse de formazion par dipendente de la aministraziones publiches co i proiete finanziade da la normes del Stato par la tutela de la minoranzes linguistiches storiches, e corse de formazion par ci che laora par organidaziones turistiches privates con outra vies de finanziamento.
Fin ades, l Istituto no l à mai proà a fai vere corse de formazion de ladin par chi del luó o par i nuoe residente.
Italiano
